ЭРХЭМ ЗОРИЛГО : “Монгол угсаатан, ястны утга соёлын өвийн сор дээжсийг сурталчлах, судлах, сургах хийгээд үйлчлүүлэгч, харилцагч түншүүдийнхээ эрэлт шаардлагад нийцсэн орчин цагийн болон дэлхийн сонгомол бүтээлийг урлах чадавхи бүхий өндөр боловсролтой хамт олны бүрдлийг нэгтгэсэн мэргэжлийн урлагийн төв байхын эрхэм зорилго оршино”.

Товч танилцуулга: ҮДБЭЧуулга нь анх “Эстрад концертын товчоо” нэртэйгээр 1945-онд үндэслэгдэн байгуулагдаж улмаар 1950-онд “Ардын дуу танцын улсын ансамбль” хэмээн өөрчлөгдөж өнөөгийн тулгын чулуу тавигдсан билээ. 2002 онд “Үндэсний Дуу Бүжгийн Эрдмийн Чуулга” нэртэй болж өөрчлөгдсөн. Тус чуулгын түүх нь монгол түмний өнө эртний дуу хуур, бүжиг наадам, аман өвийн уламжлалд тулгуурласан арвин сан хөмрөгтэй, ард түмний авъяас билгийн сэжмээр холбоотой шавхагдашгүй арвин ундрагатай билээ. Өдгөө хагас зуунаас чанагш жилийн хугацаанд Монголын олон үндэстэн, угсаатны олон зууны турш бүтээж, өвлөн хамгаалж, уламжилж ирсэн ардын урлагийг баяжуулан хөгжүүлж, өөрийн оронд болон гадаадын 100 гаруй оронд сурталчилан Монгол улсаа дэлхий дахинд таниулахад чухал хувь нэмрээ оруулсан билээ.

Тус Чуулга анх дан концертын бүтээл голлон тавьдаг байсан бол сүүлийн жилүүдэд Монгол ардын урлагийн өв сангаас төдийгүй өөрийн орны болон дэлхийн сонгодог нэрт уран бүтээлчдийн шилдэг туурвилыг тайзнаа хөрвүүлэн сэдэвчилсэн, түүхчилсэн бүтээл, ардын бүжгэн жүжиг, дуулалт бүжиг, орчин үеийн модерн бүжгэн жүжиг зэрэг томоохон бүтээл туурвидаг мэргэжлийн урлагийн байгууллага болсон юм.